DeToor reflective wanderings…
Related Articles
തിരുവനന്തപുരം: രാജ്യത്തെ ആദ്യ സമ്പൂര്‍ണ്ണ ഡിജിറ്റല്‍ സാക്ഷരതാ സംസ്ഥാന പദവി കേരളത്തിന്. തിരുവനന്തപുരത്ത് ഇന്ന് വൈകീട്ട് 4.30ന് നടക്കുന്ന പരിപാടിയില്‍ മുഖ്യമന്ത്രി പിണറായി വിജയനാണ് പ്രഖ്യാപനം നടത്തുക. 14നും 60നും പ്രായമുള്ള 99 ശതമാനം ആളുകളും സംസ്ഥാനത്ത് ഡിജിറ്റല്‍ സാക്ഷരത നേടി എന്നതാണ് സംസ്ഥാന സര്‍ക്കാരിന്റെ അവകാശവാദം.
2022ല്‍ ഡിജി കേരളം എന്ന പേരിലാണ് സാക്ഷരതാ യജ്ഞം സര്‍ക്കാര്‍ കൊണ്ടുവരുന്നത്. ഡിജിറ്റല്‍ സാക്ഷരരല്ലാത്ത 14 വയസ്സിന് മുകളിലുള്ളവരുടെ വിവര ശേഖരണം നടത്തലായിരുന്നു ആദ്യഘട്ടം. 83.45 ലക്ഷം കുടുംബങ്ങളില്‍ നിന്നായി ഒന്നരക്കോടിയോളം ആളുകള്‍ക്കിടയില്‍ സര്‍വേ നടത്തിയാണ് വിവരശേഖരണം നടത്തിയത്. ഇതില്‍ നിന്നും തിരഞ്ഞെടുത്ത 21,88,398 പേര്‍ക്ക് ഡിജിറ്റല്‍ വിദ്യഭ്യാസം നല്‍കി. ഇതില്‍ 99.98 ശതമാനം പേരും വിജയിച്ച് ഡിജിറ്റല്‍ സാക്ഷരത സര്‍ട്ടിഫിക്കറ്റും നേടിയിരുന്നു. ഇവരില്‍ 15,223 പേര്‍ 90 വയസ്സിന് മുകളിലുള്ളവരാണ്.
മൂന്ന് മോഡ്യൂളുകളിലായി 15 ആക്റ്റിവിറ്റികള്‍ തയ്യാറാക്കി വിശദമായ പരിശീനവും വിലയിരുത്തലുമാണ് പഠിതാക്കള്‍ക്കിടയില്‍ നടത്തിയതെന്ന് തദ്ദേശ ഭരണ വകുപ്പ് വിശദീകരിക്കുന്നു. സ്മാര്‍ട്ട് ഫോണ്‍, ഇന്റര്‍നെറ്റ് ഉപയോഗം, സര്‍ക്കാറിന്റെ ഇ സേവനങ്ങള്‍ പ്രയോജനപ്പെടുത്തല്‍ എന്നിവയാണ് പാഠ്യവിഷയങ്ങള്‍. അതേസമയം ഡിജി കേരളം പദ്ധതിയുടെ പ്രവര്‍ത്തനങ്ങളെല്ലാം തെരഞ്ഞെടുപ്പ് ഗിമ്മിക്കുകളാണെന്നാണ് പ്രതിപക്ഷ വിമര്‍ശനം. ഒരു വശത്ത് വിമര്‍ശനം വരുമ്പോള്‍ പരിശീലനത്തിന്റെയും തുടര്‍ പരിശീലനത്തിന്റെയും വിലയിരുത്തലുകള്‍ നടത്തി, ഇക്കണോമിക് ആന്റ് സ്റ്റാറ്റിസ്റ്റിക്കല്‍ വകുപ്പ് മുഖേന പദ്ധതിയില്‍ സുതാര്യത ഉറപ്പാക്കിയിട്ടുണ്ടെന്നാണ് സര്‍ക്കാര്‍ വാദം.
