പ്ലസ് വൺ ക്ലാസുകൾ ആരംഭിച്ചിട്ടും സീറ്റ് ലഭിക്കാതെ ഒരു ലക്ഷത്തിലധികം വിദ്യാർഥികൾ

തിരുവനന്തപുരം: സംസ്ഥാനത്ത് പ്ലസ് വൺ ക്ലാസുകൾ ആരംഭിച്ചിട്ടും ഒരു ലക്ഷത്തിലധികം വിദ്യാർഥികൾക്ക് ഇനിയും സീറ്റ് ലഭിച്ചില്ല. മൂന്ന് അലോട്ട്മെന്റുകൾ പൂർത്തിയായപ്പോൾ 1,01,849 വിദ്യാർഥികളാണ് സീറ്റ് ലഭിക്കാതെ പുറത്ത് നിൽക്കുന്നത്.

ഇവർക്ക് ഇനി സപ്ലിമെന്ററി അലോട്ട്മെന്റിനായി കാത്തിരിക്കുകയോ മറ്റ് കോഴ്സുകളിൽ ചേരുകയോ വേണ്ടിവരും. ഇതുവരെ 3,15,986 വിദ്യാർഥികൾക്ക് പ്ലസ് വൺ പ്രവേശനം ലഭിച്ചെന്നാണ് വിദ്യാഭ്യാസ വകുപ്പ് അറിയിച്ചത്. ഈ വർഷം എസ്.എസ്.എൽ.സി വിജയിച്ച 4,24,583 വിദ്യാർഥികളാണ് ഉണ്ടായിരുന്നത്. മറ്റ് സിലബസുകളിൽ പത്താം ക്ലാസ് വിജയിച്ചവർ ഉൾപ്പെടെ ആകെ 4,63,686 പേരാണ് പ്ലസ് വൺ സീറ്റിനായി അപേക്ഷിച്ചത്.